Heb 13 | WSK | STEP | Nina launuria iwita ninimi ko ninguru kua se lagaralko.

Hebrews 13

Munan saki Kris alo karo tumonko

1 Nina launuria iwita ninimi ko ninguru kua se lagaralko. 2 Ale kariimet awar taisan mu nunga sinar talko mu ko iki se bagaralko. Saki butata bitakasan ale engel mu kari nunguning nunga balman ale nunga sinar tokasan. 3 Ale kariimet talipara ningi anisan mu nunga ago ikialko, nina arungu bagasan iwitata. Ale ninga saki alo nunga bita maguwuwasan mu nunga ago ikia talko, nina ago memek tasan iwitatala. ^{▼▼Heb 13:3 Ana kariimet saki talipara ningi anisan mu nunga ikinakko: Mat 25:36.}

4 Nuwus-kuari ko munan mu diram la karo tualko, ale imet mu kari bo kigilik ilak me tere nauk, se kari mu imet bo kigilik ilak me tere naukko. Mu awuk, Kaem kariimet nuwus-kuari ko munan kiasan, ale kariimet ngual ngual saman katagot betesan, mu koma memek nungarukko.

5 Ninga ikia nengemang mu manga mel ko tawun biya me niaralko. Anapeya mel nina iluwasan umu la karogo amilmilaralko, bo ago ko me ikia ninga morukko. Mu awuk, Kaem iwita balam:

“Ani me ta ka bitirikkowo,
ale me abiring kisekkowo. Mena.” ^{▼▼Heb 13:5-6 Joshua 1:5; Psalm 118:6. Ana manga mel ko me kuenakko: 1 Tim 6:6-10.}
6 Buta se, ana nangamang namara taira bo mena, sokel ago la iwita balnakko:

“Kari Biya mu aninga saonga, se ani me nguangirikko.
Ale awiri ani angimik te awuk maukko? Mena.” Uwutata balnakko.
7 Nina ninga supuling alo Kaem ko den ninga manorman mu nunga ikialko. Ale nunga bagara aolak, nunga namara taira mu ko ikial ale, nuna iwitatala nengemang ningi nunguning te bagaralko.

8 Jesus Kristus ko munan mu am koma suwanta, ekalako, aitakta, se tom suen biya ko. 9 Se nina ikia duap duap ninga kasurmon se munan lage diram te bagasan wore beteral bore ko sinar talko. Mu awuk, Kaem ko gomang nangaram mu te nanga nangamang motam sokel ago anirukko. Bare inang na ko munan duap duap mu te mena. Kariimet munan duap duap umu karo tusan bare mu me nunga sangarso. 10 Anananga altar te na inang gi nanak ale sokel tanakko mu karogo, mu awuk, Jesus ana nago ko tama beteram. Bare priest alo kawam kako sel ningi ura betesan, mu nuna anananga altar mu te na inang me gi namonko.

11 Nononga priest supuling mu bulmakau mel nunga gue mu giso, ale karogo kuwim kako mu ningi kasu naguso, ale kariimet nunga memek te siwurokko Kaem koma te beteso. Bare bulmakau mel nunga nungumik guang mu sor nuna te bagasan mu ko buring ko kaisan. 12 Umutang ko, Jesus betela wonong kar buring ko tam kangono te tagiman se kueram, nu kota ko gue te ko kariimet nunga kako awurokko. 13 Buta se ana kariimet biguwura biya mu nunga bita tanak ale, aratanak wonong buring ko nukote namanak, ale nu dolara giam turantala dolara ginakko. ^{▼▼Heb 13:13 Ana Kristus nup ko, ikup am ginakko: John 15:18-21; 1 Peter 4:14.} 14 Mu awuk, anananga wonong nunguning bo ali imi te me aniso. Bare ana wonong nunguning tom suen biya te baganakko mu ko namatam bitawasan.

15 Buta se Kaem tama tua iwitata, ana tom suen biya Jesus te nup patawu se, amilmil tui se laganakko. 16 Nina ninga sikisaki nunga saongal ale munan ningo nungumik te beteralko mu ko me ningamili sapurukko. Mu awuk, munan umutang mu tama tua iwita, se Kaem ko kueso.

17 Ninga supuling nuguring karo tual ale nobowa ningi bagaralko. Nuna maingte nunga ura beteman mu ko Kaem manarmonko se, mu ko nuna iki se ninga sinar to lagasan. Buta se nuguring kaoralko, se mu te nuna nunga ura amilmil ago betemonko. E mena mu, nuna nongomang bataga se ura ilumonko, se munan umutang mu me ninga sangukko.

18 Ana nago ko ngatongalko. Ana ikisan, anananga ikia se nanga nangamang motam mu Kaem koma te diram, mu awuk, ana tom suen biya diram la aolak ilunakko nangamang aniso. 19 Se ani akingtala ninga manorsam, nina ani ago ko Kaem ninguru ngatongal se, aga sanguk se tairatela nengete pelerik tairikko.

Marak den se den nukum

20 Kaem nu lila yawara ko duap. Nu Sipsip Bitua Kari Ningo Jesus kueram wore patowaram se aking barasam, se ko gue te den iru nago ko nungam mu tom suen biya te anirukko sokel tuam se aniso. 21 Se aninga angamang mu iwita: Kaem borta nanga Biya Jesus Kristus te mel suen biya te ninga sanguk se, nina noko ikia gomang la karo tualko. Ale nanga ningi ura tauk se ana munan nu ko kueso mu la betenakko. Se ana noko nup tom suen biya patawu se laganakko! Nunguning.

22 Aga singsang, ani iwita ninga manorsam, nengemang sokel tua ko den ani ninga manem imi mu, lila te am ikial ale nengemang ningi beteralko. Tam gawa bataguru ningarem imi mu maiya mena, tukunangta.

23 Ani nanga bo Timothy talipara ningi bagaram mu aratam wore ko nina ikialko ninga manorsam. Nu tairate aningate tairuk agi mu, ani ilak nina ningarka ko namanakko. 24 Anananga amilmil den ninga supuling suen biya, se Kris alo suen la nunga maonal se ikimonko. Italy Kris alo nunga amilmil den nina nengete beteman.

25 Kaem ko gomang lila nina suen la nengerak bagurukko. Nunguning.